बाबासाहेबांनी उत्तरं दिली होती…

 

संपादकीय............✍️

बाबासाहेबांनी उत्तरं दिली होती…

वृत्त एकसत्ता न्यूज 

संकलक : आकाश भाग्यवंत नायकुडे 

अकलूज दिनांक 27/04/2026 :

बाबासाहेबांनी उत्तरं दिली होती… आपण अजून प्रश्नातच अडकलो आहोत. रात्र बदलली, दिवे बदलले, शहरांचे नकाशे बदलले, हातातल्या मोबाईलने जग खिशात आणलं… पण माणसाच्या डोक्यातला अंधार तसाच राहिला. म्हणून बाबासाहेब आजही लागतात. कारण ते इतिहासासाठी जन्मले नव्हते, ते अंधाराला नाव देण्यासाठी जन्मले होते. आज खोटं इतक्या वेगाने धावतं की सत्याला चप्पल घालायलाही वेळ मिळत नाही. अफवा आता पंख लावून उडते, आणि विचार अजूनही काठी टेकून चालतो. लोक बातमी वाचत नाहीत, ती गिळतात. प्रश्न विचारत नाहीत, Forward करतात. बाबासाहेबांनी म्हणूनच शिक्षणाला अक्षरांचा हार नाही, तर विवेकाची तलवार म्हटलं. कारण पुस्तक वाचणारा माणूस हुशार होतो पण स्वतःला वाचणारा माणूस जागा होतो. जात अजून मेलेली नाही, तिने फक्त कपडे बदललेत. पूर्वी ती विहिरीजवळ उभी होती, आता ती ऑफिसच्या Interview मध्ये बसली आहे. पूर्वी ती दारात थांबवत होती, आता ती हसत हसत संधी नाकारते. पूर्वी अपमान उघडा होता, आता तो सभ्य भाषेत येतो. बाबासाहेबांनी लढा व्यवस्थेविरुद्ध दिला नव्हता, त्यांनी माणसाच्या छातीतल्या गर्वाविरुद्ध रणशिंग फुंकलं होतं. आजचा तरुण हातात Degree घेऊन उभा आहे, पण रस्ता त्याच्याकडे पाठ करून चाललाय. डोळ्यात स्वप्नं आहेत, खिशात अर्ज आहेत, आणि मनात भीतीचा धूर आहे. बेरोजगारी ही फक्त नोकरी नसण्याची गोष्ट नाही; ती हळूहळू आत्मविश्वास खाणारी वाळवी आहे. बाबासाहेब म्हणाले असते — काम लहान नसतं, माणसाची हार लहान असते. उठ, शिक, उभा राहा, स्वतःची किंमत स्वतः ठरव.स्त्री अजूनही देव्हाऱ्यात पूजली जाते आणि दाराबाहेर थांबवली जाते. तिच्या कपाळावर कुमकुम लावणारा समाज तिच्या स्वप्नांना मात्र काळं फासतो. घरात तिच्या हातची भाकर खातो, पण निर्णयाच्या टेबलावर तिची खुर्ची रिकामी ठेवतो. बाबासाहेबांनी स्त्रीला दयेची भाकर नाही, अधिकाराची जमीन द्यायची भाषा केली. म्हणून ते आजही जिवंत वाटतात. शाळा आहेत, कॉलेज आहेत, मोठमोठे बोर्ड आहेत… पण सगळ्यांसाठी समान दारं आहेत का? एका मुलाकडे AC class आहे, दुसऱ्याकडे अभ्यासासाठी दिवाही नाही. एका मुलाकडे Coaching आहे, दुसऱ्याकडे घर चालवायचं ओझं आहे.शिक्षणातली विषमता म्हणजे भविष्यातला दरोडा आहे. बाबासाहेबांना माहिती होतं— गरीबाच्या मुलाच्या हातात पुस्तक दिलं, तर नशिबाचा नकाशा बदलतो. आज आपण समस्या Modern नावांनी ओळखतो, पण त्यांचा वास जुना आहे. Fake news म्हणजे नव्या बाटलीतलं जुनं अज्ञान. Discrimination म्हणजे इस्त्री केलेला जुना तिरस्कार Unemployment म्हणजे थकलेल्या स्वप्नांची रांग. Women’s rights म्हणजे अजून न दिलेला न्याय. Education Inequality म्हणजे उद्याच्या पोटावरचा आजचा दगड. बाबासाहेबांनी उत्तरं लिहून ठेवली होती. आपण अजूनही प्रश्नच जपून बसलो आहोत. ते गेले नाहीत.ते प्रत्येक वेळी परत येतात.जेव्हा एखादा विद्यार्थी हार मानतो, जेव्हा एखादी मुलगी थांबवली जाते, जेव्हा एखाद्याला नावावरून तोललं जातं, जेव्हा खोटं सत्याच्या खुर्चीत बसतं. बाबासाहेब म्हणजे पुतळ्यावरचा हार नाही.ते समाजाच्या कपाळावर ठेवलेला तापमापक आहेत. 93 26 36 53 96