🔰"पंढरपूर-सातारा मुख्य मार्गावरील" साळमुख- पिलीव" रस्ता झालाय मृत्यूचा सापळा" 🟠 रस्ता तातडीने दुरुस्त न केल्यास जनआंदोलन करण्याचा इशारा

 

🔰"पंढरपूर-सातारा मुख्य मार्गावरील" साळमुख- पिलीव" रस्ता झालाय मृत्यूचा सापळा"

       🟠 रस्ता तातडीने दुरुस्त न केल्यास  जनआंदोलन करण्याचा  इशारा

वृत्त एकसत्ता न्यूज 

पिलीव प्रतिनिधी:- "पंढरपूर-सातारा मुख्य मार्गावरील" साळमुख- पिलीव" रस्ता झालाय मृत्यूचा सापळा" हा रस्ता तातडीने दुरुस्त न केल्यास  जनआंदोलन करण्याचा  इशारा देण्यात आला आहे.

पंढरपूर- सातारा या मार्गाला प्रति पालखी मार्ग असे संबोधले जाते. आणि त्याप्रमाणे आषाढी कार्तिकी व माघी वारीला सांगली, सातारा ,सोलापूर या जिल्ह्यातून व अनेक ठिकाणाहून पंढरपूरच्या विठ्ठल रुक्मिणीच्या दर्शनासाठी अनेक साधुसंतांच्या दिंड्या व पालखी सोहळे ये- जा करीत असतात.

याशिवाय व्यापारी वर्ग त्यांचा असणारा आयात- निर्यातीचा माल, शेतकऱ्यांच्या शेतीचा माल उदाहरणार्थ मोठ्या प्रमाणात ऊसाची वाहतूक अशा अनेक उद्देशाने मोठ्या प्रमाणात रहदारी असते याशिवाय शालेय विद्यार्थ्यांच्या बसेस, मोठमोठ्या शहरांकडे जाणाऱ्या बसेस, याशिवाय दुचाकी स्वार, शिक्षणासाठी ये जा करीत असलेले विद्यार्थी विद्यार्थिनी, बाजारहाट करण्यासाठी जात- येत असलेले दुचाकीस्वार यांना या मार्गावरून प्रवास करीत असताना आपला जीव मुठीत धरून ये -जा करावी लागते. 

आणि हे काल-परवा आज असे नसून गेल्या चार वर्षापासून या रस्त्याची अशी अवस्था आहे खड्ड्यात रस्ता की रस्त्यात खड्डा असा मोठा प्रमाणात जिकिरीचा प्रवास करावा लागत आहे. आठवड्यातून एक अपघात ठरलेलाच आहे, या अपूर्ण रस्त्यामुळे अनेकांचे जीव गेलेले आहेत. वास्तविक याबाबत संबंधित अधिकाऱ्यांना त्याचप्रमाणे मंत्री यांना सुद्धा ग्रामस्थांनी निवेदने दिलेली आहे. परंतु सदर रस्त्याचे काम करणाऱ्या ठेकेदाराकडून सर्वांच्याच विनंतीला केराची टोपली दाखवली गेलेली आहे. अनेक वर्तमानपत्राद्वारे सुद्धा याबाबत वाचा फोडण्याचा प्रयत्न केलेला आहे. परंतु झोपी गेलेल्या ठेकेदाराला काडीचा सुद्धा फरक पडला नाही. या रस्त्यावरुन प्रवास करताना दुचाकी स्वारालाच नव्हे, तर मोठ्या वाहनांना सुद्धा जीव मुठीत धरून मोठी कसरत करून प्रवास करावा लागत आहे. याविषयी असंख्य ग्रामस्थांच्या व वेगवेगळ्या संघटनांनी संताप व्यक्त केला  असून आता जर याबाबत त्वरित लक्ष देऊन सदरचे खड्डे बुजून घेतले नाहीत किंवा रस्ता व्यवस्थित केला नाही, तर अखेरचे व अतिशय वेगळ्या पद्धतीने जनआंदोलन करण्याचा इशारा अनेक संघटना व ग्रामस्थांनी दिला असल्याचे समजते. त्यातून काही  घडल्यास होणाऱ्या परिणामास संबंधित ठेकेदार व संबंधित खाते जबाबदार राहील असाही इशारा देण्यात आल्याचे समजते.