DCC बँक निवडणूक : पंढरपुरात नवीन राजकीय समीकरणे जुळणार? रणजितसिंह मोहिते पाटील उतरले मैदानात

वृत्त एकसत्ता न्यूज

संकलक : आकाश भाग्यवंत नायकुडे

अकलूज दिनांक 28/10/2026 :

सोलापूर : सोलापूर जिल्हा मध्यवर्ती सहकारी बँकेच्या निवडणुकीच्या निमित्ताने जिल्ह्यातील राजकीय हालचालींना वेग आला असून, नेत्यांच्या भेटीगाठी आणि बैठकांमधून नवी समीकरणे आकाराला येण्याची चर्चा सुरू झाली आहे. पालकमंत्री जयकुमार गोरे यांनी भाजप नेत्यांशी चर्चा करून निवडणुकीची तयारी सुरू केली असतानाच, मोहिते-पाटील गटानेही जिल्ह्यातील विविध नेत्यांशी संवाद साधण्याचा प्रयत्न सुरू केला आहे. याच पार्श्वभूमीवर सोमवारी पंढरपुरात माजी आमदार रणजितसिंह मोहिते पाटील आणि भाजप नेते प्रशांत परिचारक यांच्यात झालेली भेट चर्चेचा विषय ठरली आहे.

पंढरपूर तालुक्यातील जिल्हा बँकेच्या निवडणुकीत मतदानाचा अधिकार असलेल्या ठरावधारकांची बैठक सोमवारी प्रशांत परिचारक यांच्या उपस्थितीत झाली. या बैठकीत परिचारक जो निर्णय घेतील, तो मान्य करण्याची भूमिका ठरावधारकांनी मांडली. मात्र, त्याचवेळी कार्यकर्त्यांनी दोन प्रमुख मागण्याही पुढे केल्या. परिचारक यांनी स्वतः निवडणुकीच्या रिंगणात उतरावे आणि पंढरपूर तालुक्याला जिल्हा बँकेत तीन जागा मिळाव्यात, अशी अपेक्षा व्यक्त करण्यात आली. जिल्ह्यात पंढरपूर तालुक्यातील मतदारांची संख्या अधिक असल्याचा मुद्दाही यावेळी पुढे करण्यात आला.

या बैठकीनंतर रणजितसिंह मोहिते पाटील यांनी तेथे भेट दिली. त्यानंतर मोहिते पाटील आणि परिचारक यांच्यात स्वतंत्रपणे सुमारे अर्धा तास चर्चा झाली. दोन्ही नेत्यांमध्ये नेमक्या कोणत्या मुद्द्यांवर संवाद झाला, याबाबत अधिकृत माहिती समोर आलेली नाही. मात्र, जिल्हा बँकेच्या निवडणुकीसाठी विविध गटांकडून पाठिंबा आणि सहकार्याची गणिते मांडली जात असताना या भेटीकडे राजकीय वर्तुळाचे लक्ष लागले आहे.

दरम्यान, अकलूज येथील शिवरत्न बंगल्यावर झालेल्या बैठकीत रणजितसिंह मोहिते पाटील यांनी जिल्ह्यातील नेत्यांशी प्रत्यक्ष भेटून चर्चा करण्याची भूमिका मांडली होती. त्यानंतर त्यांनी माढ्याचे आमदार अभिजित पाटील यांच्याशी संवाद साधला आणि आता प्रशांत परिचारक यांची भेट घेतली. त्यामुळे जिल्हा बँकेच्या निवडणुकीसाठी व्यापक पातळीवर चर्चा सुरू असल्याचे चित्र आहे.

दुसरीकडे, पालकमंत्री जयकुमार गोरे यांनी जिल्हा बँकेवर भाजपचे वर्चस्व प्रस्थापित करण्याच्या दृष्टीने हालचाली सुरू केल्या आहेत. अशा परिस्थितीत भाजपशी संबंधित परिचारक आणि मोहिते-पाटील गटातील नेत्यांची झालेली चर्चा महत्त्वाची मानली जात आहे. मात्र, या भेटीतून कोणते राजकीय निर्णय होणार, कोणत्या गटांना एकत्र आणले जाणार आणि जागावाटपाचे सूत्र काय असेल, हे अद्याप स्पष्ट झालेले नाही.

एकूणच, सोलापूर जिल्हा मध्यवर्ती सहकारी बँकेची निवडणूक केवळ सहकार क्षेत्रापुरती मर्यादित न राहता जिल्ह्यातील विविध राजकीय गटांच्या समन्वयाची आणि स्थानिक नेतृत्वाच्या भूमिकेची कसोटी ठरणार आहे. पंढरपूरमधील बैठकीत मांडलेल्या मागण्या आणि नेत्यांमधील सुरू असलेल्या चर्चांमुळे आगामी काळात जागावाटप व गटांच्या भूमिकांबाबत कोणते निर्णय होतात, याकडे जिल्ह्याचे लक्ष लागले आहे.