💢 कामाची दिरंगाई, वाढत्या रहदारीचा रस्त्यावरील ताण आणि प्रत्येकाला झालेली घाई यातून एकाचा अपघाती मृत्यू 🟪 "ज्यांच्यासाठी विकास करायचा त्या जिवांचाही विचार होणे गरजेचे"; नागरिकात चर्चा

 💢 कामाची दिरंगाई, वाढत्या रहदारीचा रस्त्यावरील ताण आणि प्रत्येकाला झालेली घाई यातून एकाचा अपघाती मृत्यू

🟪  "ज्यांच्यासाठी विकास करायचा त्या जिवांचाही विचार होणे गरजेचे"; नागरिकात चर्चा

वृत्त एकसत्ता न्यूज

आकाश भाग्यवंत नायकुडे

अकलूज दिनांक 10/06/2026 :

अकलूज येथील बस स्थानकाच्या पाठीमागे, महावीर पथ कडे जाणाऱ्या रोडवर भर दुपारी मिक्सर वाहन (टँकर) व मोटर सायकलची समोरा समोर धडक होऊन झालेल्या अपघातात सचिन सुभाष काळे (वय ४२,रा. बागेचीवाडी, पद्मावतीनगर, ता.माळशिरस, जि.सोलापूर) या प्लंबरचा जागीच मृत्यू झाला असून, अकलूज पोलीस ठाण्यात गुन्हा दाखल झाला आहे.

अपघातानंतर नागरिकांनी सचिन यांना तातडीने उपचारासाठी नजीकच्या खाजगी हॉस्पिटल मध्ये दाखल केले असता डॉक्टरांनी तपासणी करून त्याचा मृत्यू झाल्याचे सांगितले.

या प्रकरणी मृताचे वडील सुभाष विष्णू काळे (वय 70 वर्षे) यांनी मिक्सर चालक मधुकर आण्णा जानकर (रा.जाधववाडी, भांबुर्डी, ता.माळशिरस) याचे विरोधात अकलूज पोलीस ठाण्यात फिर्याद दिली आहे.त्या वरून मिक्सर चालक मधुकर आण्णा जानकर याच्या विरुद्ध अकलूज पोलीस ठाण्यात गु.र.नं. ४१७/२०२६ अन्वये भारतीय न्याय संहिता (BNS) कलम १०६ (१), २८१, मो.वा.का. १८४, १३४(A), १३४ (B) प्रमाणे गुन्हा दाखल करण्यात आला आहे. पुढील तपास पोलीस हेड कॉन्स्टेबल (HC) ९८० बागडे करत आहेत.

अनेक दिवसांपासून सदर रस्त्याचे काम सुरू आहे. कामाची दिरंगाई, वाढत्या रहदारीचा रस्त्यावरील ताण आणि प्रत्येकाला झालेली घाई यातून अनेकदा अपघाती प्रसंग निर्माण झाले.  यावेळी मात्र एकास आपले प्राण गमवावे लागले. रस्ता रुंदीकरणाचे काम करताना एक बाजू अगोदर पूर्ण करून नंतर दुसरी बाजू करता आली असती परंतु तसे न करता एकाच वेळेला सर्व रस्ते खोदून ठेवल्याने रहदारी मध्ये मोठ्या प्रमाणात विस्कळीतपणा निर्माण होऊन दररोज छोट्या-मोठ्या बिकट प्रसंगांना तोंड देत जीव मुठीत धरून प्रवाशांना तेथून ये जा करावी लागत आहे. ज्या ठिकाणाच्या रस्त्याचे काम करायचे त्या परिसरातील पर्यायी रस्ते व्यवस्थित असायला हवेत याचेही भान  अतिशय मोठ्या प्रमाणात कामांचा धबडगा उभा करताना न राहिल्याने विविध ठिकाणी अनेकदा अपघाताचे बिकट प्रसंग निर्माण झाले आणि होत आहेत. महत्त्वाचे म्हणजे सुरू असलेल्या कामांच्या दर्जाबाबत आणि आणखी किती अपघात घडतील याचे उत्तर आगामी काळच देईल. विकास कामे करताना ज्यांच्यासाठी विकास करायचा त्या जिवांचाही विचार होणे गरजेचे आहे असे नागरिकातून बोलले जात आहे.