🟦 कुणी कधी झुरळ पाळल्याचे ऐकले आहे का? 'झुरळ' आणि 'मेलडी' शब्दांनी देशात माजवला हलकल्लोळ!

 

🟦 कुणी कधी झुरळ पाळल्याचे ऐकले आहे का? 'झुरळ' आणि 'मेलडी' शब्दांनी देशात माजवला हलकल्लोळ!

🟩 इंटरनेटच्या पंखांवर स्वार होऊन कोणता शब्द केव्हा क्षेपणास्त्र होईल, हे सांगणे मोठे कठीण! अशा दोन ताज्या शब्दांची मोठी रोचक कहाणी.

वृत्त एकसत्ता न्यूज 

संकलक : आकाश भाग्यवंत नायकुडे 

अकलूज दिनांक 31/05/2026 :

गेल्या काही दिवसांपासून दोन शब्दांनी मोठा हलकल्लोळ माजवला आहे. एक शब्द आहे झुरळ. हिंदीमध्ये त्याला तिलचट्टा म्हणतात आणि दुसरा शब्द आहे मेलडी. दोन्ही शब्दांनी मोठा धुमाकूळ घातला आहे. त्याचे संदर्भ तर आपण जाणताच..!

भारताचे सरन्यायाधीश सूर्य कांत यांनी एका खटल्याच्या सुनावणीच्या वेळी आपल्या भावना व्यक्त करताना काही उद्देशाने झुरळाचा उल्लेख केला. ते काही लोकांना खटकले. न्यायाधीशांचे विधान त्यांनी देशाच्या युवकांशी जोडले. अर्थात, सरन्यायाधीशांनी तत्काळ खुलासा केला की, आपल्याला तसे म्हणावयाचे नव्हते. परंतु, एखाद्या दुखऱ्या मनाच्या व्यक्तीने जर एखादी अशी गोष्ट मनाला लावूनच घेतली, तर काय करणार? असे एक महाशय अभिजित दीपके यांनी 'कॉक्रोच जनता पार्टी' स्थापन केली. हा काही वैधानिक राजकीय पक्ष नाही, परंतु, समाजमाध्यमांवर त्यामुळे चांगलाच खकाणा उडाला. या पक्षाला कोट्यवधी अनुयायी मिळाले आणि आता असे सांगितले जात आहे की, त्यावर बंदी आणण्यात आली आहे.

अशा प्रकारची खोडी काही पहिल्यांदा काढली गेलेली नाही. इंटरनेटवरचे हवाई उड्डाण आणि तोंडघशी पडून आपटणे यात नवीन काही नाही. या देशात उभी राहिलेली अनेक आंदोलने काळाबरोबर पुसली गेली. गुजरातचे हार्दिक पटेल आठवतात? आपल्या राजकारणाने त्यांना घोळात घेऊन पिऊन टाकले. हे महाशय सध्या काय करतात? तर ते गुजरातच्या विरमगावमधून भाजपचे आमदार आहेत. फक्त गुजरातच नव्हे, आसाम, पंजाब आणि इतर अनेक राज्यांमधील अनेक आंदोलनांची दुर्दशा सर्वांनी पाहिली आहे. चला, आपण पुन्हा मूळ विषयावर येऊ आणि झुरळाची काही वैशिष्ट्ये पाहू. झुरळ हा प्राचीन आणि लवचिक जीव. डायनासोरच्या काळापासून म्हणजे कमीतकमी ३५ कोटी वर्षांपासून झुरळ पृथ्वीतलावर अस्तित्वात आहे. डोके नसतानाही ते काही आठवडे जिवंत राहू शकते. ४० मिनिटापर्यंत श्वास रोखू शकते आणि पाण्याच्या खाली अर्ध्या तासाहून अधिक काळ जिवंत राहू शकते. असे म्हणतात, की प्रलय आला तरी त्यातूनही वाचतील ती झुरळेच!

अशी शक्ती दुसऱ्या कुठल्याही जिवामध्ये नाही; पण अशा या शक्तिमान जिवाला कोणी पाळल्याचे कधी कानावर आले का? मी प्रत्येक जीवमात्राविषयी संवेदना बाळगतो. परंतु हे खरे की, जगामध्ये बहुतेक लोक झुरळ दिसताच त्याला मारण्याचा विचार करतात! जर्मनीमध्ये बसून ध्रुव राठीसारखे लोक जेव्हा सांगतात की, 'झुरळ परत आले आहे आणि ५६ इंची छाती घाबरली आहे ', यामागे नक्की काय हेतू असावा? _भारताची_ आर्थिक प्रगती पाहून जळणाऱ्या दृश्य गुप्तचर संस्था, तर यासगळ्याच्या मागे नसतील?

ज्या लोकांची अपेक्षा आहे की भारतातील जेन-झीकडून नेपाळ आणि बांगलादेशसारखे वर्तन करुन घेता येईल, ते हवेत मनोरे रचत आहेत. भारतात जेन-झी असो किंवा जेन अल्फा, हे अत्यंत समजूतदार लोक आहेत. ते प्रत्येक गोष्ट बारकाईने समजून घेतात. १९९७ ते २०१२ च्या दरम्यान जन्माला आलेले लोक आणि त्यानंतरच्या मुलांना जेन अल्फा गणले जाते. आमची युवा पिढी वैचारिकदृष्ट्या इतकी समर्थ, सजग, स्वाभिमान आणि राष्ट्राविषयी समर्पण भाव राखणारी आहेत की, या तरुणांना सहजासहजी भडकावता येणार नाही. भारतातल्या जेन-झी पिढीला हे नीट समजते की, राजकारणामध्ये दोन शक्ती काम करत आहेत. एक सरकारची समर्थक आणि दुसरी सरकारची विरोधक. पण, एखादी तिसरी शक्ती जर खेळ करु पाहत असेल,  तर त्याचा कानोसा जेन-झीला तत्काळ लागेल, हे नक्की आहे. भारतातल्या या तरुणांना पक्के ठाऊक आहे की, क्रांतीच्या गोष्टी करणारे लोक आराध्य देवी-देवतांचा कधी अनादर करत नाहीत. अभद्र भाषा वापरत नाहीत. 

तरुणांच्या भावना मी खूप चांगल्या प्रकारे समजतो. मी माझ्या या सदरात अनेक वेळा लिहिले आहे की, देश प्रगतीच्या पथावर जात आहे. युवकांना उद्योगधंद्यांच्या दिशेने वळवले पाहिजे, जेणेकरुन ते इतर युवकांनाही रोजगार देऊ शकतील. रशियात पुतिन आणि चीनमध्ये शी जिनपिंग यांनी या दिशेने उत्तम काम केले आहे. आपल्या देशातही नवीन तंत्रज्ञान नवी दारे उघडून देत आहे. परंतु, ज्या तरुणांना काम मिळत नाही, ज्यांचा व्यवस्थेकडून छळ होतो, त्यांच्या मनात असंतोषाला हवा देण्याची इच्छा बाळगून अनेक विदेशी संस्था तसे प्रयत्नही करत असाव्यात, अशी शंकाही मला अनेकदा येते. परंतु, माझा भारतीय तरुणांवर पूर्ण विश्वास आहे. कुणीही विदेशी शक्ती येऊन त्यांची माथी भडकावील, हे शक्य नाही. या देशातल्या तारुण्याने आपल्या सजग समंजसपणाचा पुरावा अनेकवार दिलेला आहे.

आता थोडेसे मेलडीविषयी. मेलडी या शब्दाचा अर्थ आहे स्वर आणि संगीताचे माधुर्य. याला तराना असेही म्हणू शकता. परंतु, आता ज्या मेलडीची चर्चा होत आहे, तो चाॅकलेटचा एक ब्रॅंड आहे. आपले पंतप्रधान नरेंद्र मोदी यांनी इटली दौऱ्याच्या वेळी तिथल्या पंतप्रधान जाॅर्जिया मेलोनी यांना मेलडी ब्रॅंडचे चाॅकलेट भेट दिले. त्यातून दोन देशांच्या नातेसंबंधात माधुर्य स्पष्ट दिसू लागले. झुरळांचे घनघोर युद्ध आणि अशा रक्तरंजित काळात नातेसंबंधातील माधुर्य मनाला दिलासा देणारे आहे. भारताबद्दल अत्यंत स्नेहपूर्ण व्यवहार आणि प्रेम दाखवण्यासाठी मेलोनीजी यांचे खूप खूप आभार. सलामत रहे दोस्तांना हमारा...!

डाॅ. विजय दर्डा चेअरमन, एडिटोरियल बोर्ड, लोकमत समूह

संकलन  : यशवंत वाघ

**************************