वाळूजचे सुपुत्र सनील गोवर्धन धनवे यांची सहाय्यक पोलीस निरीक्षकपदी ( API) पदोन्नती

वृत्त एकसत्ता न्यूज

मोहोळ तालुका प्रतिनिधी दि.१९:- मोहोळ तालुक्यातील वाळूज (जि. सोलापूर) येथील सुपुत्र सनील गोवर्धन धनवे यांची महाराष्ट्र पोलीस दलात पोलीस उपनिरीक्षक (PSI) पदावरून सहाय्यक पोलीस निरीक्षक (API) पदावर पदोन्नती झाली आहे. त्यांच्या या उल्लेखनीय यशाबद्दल सर्व स्तरांतून अभिनंदनाचा वर्षाव होत आहे.

सामान्य शेतकरी कुटुंबातील असलेल्या सनील धनवे यांनी अत्यंत प्रतिकूल परिस्थितीत शिक्षण पूर्ण केले. त्यांचे प्राथमिक व माध्यमिक शिक्षण वाळूज येथील जिल्हा परिषद शाळा व वाळूज प्रशाला वाळूज हायस्कूल मध्ये झाले, तर महाविद्यालयीन शिक्षण सोलापूर येथील दयानंद कॉलेज मध्ये झाले. कठोर परिश्रम आणि जिद्दीच्या जोरावर त्यांनी महाराष्ट्र लोकसेवा आयोगामार्फत घेण्यात आलेल्या परीक्षेत प्रथम प्रयत्नात यश मिळवत एप्रिल २०१५ मध्ये PSI पद पटकावले.

सन २०१५-१६ या कालावधीत त्यांनी नाशिक येथे प्रशिक्षण पूर्ण केले. त्यानंतर कोल्हापूर परिक्षेत्रातील कवठेमहांकाळ (जि. सांगली) येथे सव्वा वर्ष सेवा बजावली. पुढे गोंदिया आणि गडचिरोली येथे त्यांनी कर्तव्य पार पाडले. गडचिरोली परिक्षेत्रात साडेतीन वर्षे सेवा देताना त्यांनी छत्तीसगड आणि मध्यप्रदेश सीमेलगतच्या नक्षलग्रस्त भागात धाडसी मोहिमांमध्ये सहभाग घेतला.

या काळात त्यांनी महाराष्ट्र पोलिसांच्या विशेष अँटी-नक्षल दल C-60 Commando Force मध्ये एक वर्ष सेवा बजावत नक्षलवाद्यांविरोधातील कारवायांमध्ये उल्लेखनीय कामगिरी केली. जंगल युद्धतंत्र, विशेष ऑपरेशन्स आणि धाडसी मोहिमांमध्ये त्यांच्या कार्याची दखल घेत सन २०२२-२३ मध्ये केंद्रीय गृह खात्याकडून “आंतरिक सेवा सुरक्षा पदक” देऊन त्यांचा सन्मान करण्यात आला.

त्यानंतर त्यांनी सालेकसा पोलीस स्टेशन येथे अडीच वर्षे सेवा बजावली. पुढे पुणे जिल्ह्यातील नारायणगाव पोलीस स्टेशन येथे साडेतीन वर्षे कार्यरत राहून एक दबंग आणि कर्तव्यदक्ष पोलीस अधिकारी म्हणून ओळख निर्माण केली. त्यानंतर मंचर पोलीस स्टेशन येथे दोन वर्षे सेवा बजावल्यानंतर त्यांना API पदावर पदोन्नती मिळाली आहे.

महाराष्ट्र पोलीस दलात PSI पदावरून API पदावर पदोन्नती मिळण्यासाठी साधारणतः ५ ते ८ वर्षांचा समाधानकारक सेवाकाल, उत्कृष्ट सेवा अभिलेख, विभागीय मूल्यांकन आणि सेवाज्येष्ठता आवश्यक असते. सनील धनवे यांनी आपल्या प्रामाणिक, धाडसी आणि उत्कृष्ट सेवेमुळे ही मानाची पदोन्नती मिळवली आहे.

त्यांच्या या यशामुळे वाळूज गावासह मोहोळ तालुक्याच्या शिरपेचात मानाचा तुरा रोवला गेला असून, सामाजिक, राजकीय, शैक्षणिक आणि विविध क्षेत्रांतील मान्यवरांकडून त्यांचे अभिनंदन करण्यात येत आहे. युवकांसाठी त्यांचा संघर्षमय प्रवास प्रेरणादायी ठरत आहे.

#API #PSI #WALUJ #mohol #MOHOLNEWS #sanildhanave