वृत्त एकसत्ता न्यूज
आकाश भाग्यवंत नायकुडे, मुंबई.
दिनांक 06/07/2025 :
अकलूज गावची ग्रामदेवता श्री अकलाई देवीची यात्रा (भंडारा) शुक्रवार दि.११ रोजी होणार आहे. त्यानिमीत्त अकलूज गावातील विविध मंडळे, सामाजिक संघटना व कार्यकर्ते यांनी अकलाई मंदिर व परिसराची साफसफाई करून स्वच्छता केली. मंदिर स्वच्छता अभियानाचा उपक्रम अकलूज ग्रामपंचायतीचे माजी सरपंच किशोरसिंह माने-पाटील यांनी सन १९८० सालापासून सुरू केला असून आजतागायत जवळ जवळ ४५ वर्षा पासून अकलूजमधील विविध मंडळे,सामाजिक संघटना व कार्यकर्ते यांच्या सहकार्यातून राबविला जात आहे. यामध्ये पाण्याने मंदिराच्या शिखरापासून मंदिराचा गाभारा व परिसर स्वच्छ धुऊन काढला जातो. तसेच देवीच्या मंदिरातील विविध भांडी आरती ताट, समई, पितळेची घंटा इत्यादींची घासून स्वच्छता करण्यात येते.
"अकलाई देवीच्या मंदिरात गत ४५ वर्षांपासून हे भक्तगण मंदिर परिसराची साफसफाई व स्वच्छतेसाठी येत आहेत. पण यामधील काही लोक वयोवृद्ध झाली आहेत. त्यामुळे पुढील वर्षीपासून नवीन तरूण वर्गांनी या उपक्रमात सहभागी होऊन ही परंपरा पुढे चालू ठेवावी." - किशोरसिंह माने-पाटील (माजी सरपंच,अकलूज ग्रामपंचायत)
0 टिप्पण्या