🤍 🌼 माणूस म्हणून जगूया मदत करूया

 🤍 🌼 माणूस म्हणून जगूया मदत करूया 

वृत्त एकसत्ता न्यूज   

संकलक : आकाश भाग्यवंत नायकुडे 

अकलूज दिनांक 16/10/2026 : वयाच्या 37 व्या वर्षी त्याला अर्धागवायू चा झटका आला. दिवस रात्र एका कॉटवर पडून.

आमच्या शेजारी एक कुटुंब राहतं. नवरा-बायको, दोन लहान मुलं आणि आई-वडील.

गेल्या महिन्यात त्या घरातील मुलाला अर्धांगवायूचा झटका आला. वय फक्त 37. बायकोचं वय 32.

तेव्हापासून रोज मी त्यांचं घर बघतेय आणि जीव तुटतोय.

रोज कोणी ना कोणी भेटायला येतंय. दिवसातून 7/8 पाहुणे. आले की चहा-पाणी, जेवण आलंच. कोणी सकाळी 11 ला येतं, कोणी दुपारी जेवणाच्या वेळेला.

आणि ती बिचारी... 

नवऱ्याचं सगळं तिलाच करावं लागतंय. डायपर पासून जेवण भरवण्यापर्यंत. दोन लहान मुलं, त्यांचा अभ्यास, त्यांचं जेवण. वर वृद्ध सासू-सासरे. त्यांचं पण वय झालंय.

तिचा जीव अगदी मेटाकुटीला आलाय. रडायचं तरी कधी आणि कुठे?

ती वैतागली आहे पाहुण्यांना नाही, तर आपल्या पद्धतीला.

आपण आजारी माणसाला भेटायला जातो आणि नकळत अजून एक ओझं टाकून येतो. काही पाहुणे तर असे असतात की, त्यांचा पाहुणचार नाही केला तर गावभर सांगतात - "तिच्याकडे गेलो, तर साधं चहा देखील नाही विचारला."

म्हणून मला वाटतं, अशा ठिकाणी जाताना आपणच थोडं शहाणं व्हावं.

आजारी माणूस आहे म्हणून दिवसातून 7-8 पाहुणे जाणं बंद करा... ती मदत नाही, त्रास आहे!

१. जेवणाच्या वेळी चुकूनही जाऊ नका. सकाळी 11 ते 1 आणि संध्याकाळी 7 ते 9 ही वेळ टाळा. ही त्यांची सगळ्यात धावपळीची वेळ असते.

२. जाताना रिकाम्या हाताने जाऊ नका, पण फळं पण नेऊ नका. 

* सगळेच फळं आणतात आणि ती घरात पडून खराब होतात. त्यापेक्षा मुलांच्या हातात 100-200 रुपये द्या. त्या पैशातून ती तिच्या गरजेचं औषध किंवा भाजी आणेल. हीच खरी मदत आहे.

३. सोबत तुमचा डबा घेऊन जा.

* हे ऐकायला विचित्र वाटेल, पण हेच खरं आहे. "आम्ही जेवण करून आलोय, आमच्यासाठी काही करू नका" असं सांगून जा. किंबहुना थोडं जास्त जेवण घेऊन जा, की "आम्ही जास्त आणलंय, तुम्ही पण थोडं घ्या". म्हणजे तिला एका वेळचा स्वयंपाक वाचेल.

४. कळवून जाऊ नका, तर सांगून जा की "काही करू नका".

* आपण फोन करून सांगतो "आम्ही येतोय" तर लाजेखातर तिला चहा, नाष्टा करावाच लागतो. त्यापेक्षा अचानक जा, 15 मिनिटं बसा आणि निघून या. जास्त वेळ बसू नका. त्यांना आरामाची गरज असते.

५. 2 पेक्षा जास्त लोकांनी एकत्र जाऊ नका.

* घोळका घेऊन गेलात की ते घर हॉस्पिटलचा वॉर्ड वाटतं. एक किंवा दोन जण जा.

६. सल्ले देऊ नका.

* "ह्या डॉक्टरकडे जा, त्या औषधाने बरं होतं" हे सगळे सल्ले तिने 100 वेळा ऐकले असतात. फक्त "काळजी घे, आम्ही आहोत" एवढंच म्हणा.

७. चहाची कपबशी उचलून विसळून ठेवा. 

* तुम्ही चहा प्यायल्यावर ती कपबशी तिथेच ठेवून येऊ नका. उचलून धुऊन ठेवा. तिची एक कामं कमी होईल.

८. त्या बायकोला पण विचारा "तू जेवलीस का?"

* सगळे नवऱ्याची तब्येत विचारतात. कोणीच तिला विचारत नाही की ती झोपली का? तिने औषध घेतलं का? तिला हेच हवं असतं.

कधी तिच्या जागी आई असते, बहीण असते,आत्या, मावशी असते पण शेवटी स्त्रीच असते.

आजार एकाला येतो, पण त्याचा त्रास अख्ख्या घराला होतो. भेटायला जाणं चुकीचं नाही, पण भेट कशी द्यायची हे आपण शिकलं पाहिजे.

तुमच्या शेजारी पण असं कोणी असेल तर हा लेख त्यांच्यापर्यंत नक्की पोहोचवा.

❤️‍🩹 हा अप्रोच नक्की सर्वांना येऊ दे. 

#मराठी #जीवन #शेजारधर्म