🍀 रानभाजी - पिंपळ 🍀

 

🍀  रानभाजी - पिंपळ  🍀 

वृत्त एकसत्ता न्यूज 

संकलक : आकाश भाग्यवंत नायकुडे 

अकलूज दिनांक 29/9/2026 :

संपूर्ण भारतभर आढळणारा हा वृक्ष विशेषतः हिमालयाच्या उताराचा भाग, पंजाब, ओरिसा, कोलकाता येथे जास्त संख्येने आढळतो. हा वृक्ष भिंतीवर, छपरावर, खडकावर, खांबावर, झाडावर, जेथे जागा मिळेल तेथे वाढतो. हा ‘वट’ कुलातील वृक्ष आहे. या वृक्षाला भरपूर आयुष्य असते म्हणून याला ‘अक्षय’ वृक्ष असे म्हणतात. या वृक्षाला बोधिवृक्ष म्हणजेच 'ज्ञानाचा वृक्ष' सुध्दा म्हटले जाते. हा वृक्ष बिहार मधील बोधगया येथे आहे. 

पिंपळाची फळे अतिशय लहान नळीच्या आकाराची असतात. ही पिकलेली फळे पक्ष्यांना खूप आवडतात. ही फळे पचण्यास कठीण असतात. न पचलेल्या फळांच्या बिया, पक्ष्यांच्या विष्ठेमार्फत इतरत्र पडून सहज उगवतात. हा वृक्ष भोवतालचे वातावरण शुद्ध करतो. याचमुळे याला पवित्र मानतात. हा कोठेही, कसाही वाढणारा वृक्ष असल्यामुळे तो मोकळ्या जागेत लावणे योग्य असते. तो घराजवळ असल्यास घराच्या भिंती, वासे, खांब यांमधे वाढून घराला हानी निर्माण करतो. पिंपळाच्या झाडापासून लाख बनवितात. याच्या औषधाने व्रण बरे करतात. उदरशूल व पोटाचे अन्य विकार यावर पिंपळाच्या फळांचा वापर करतात. याच्या सालींचा काढा पौष्टिक व शक्तिवर्धक असतो. पिंपळाच्या सालीपासून लाल रंग तयार होतो.

*पिंपळाच्या पानांची भाजी*

# साहित्य- २ वाट्या पिंपळाची देठासहित कोवळी पाने, थोडी चिंच, चार लसुण पाकळ्या, चार हिरव्या मिरच्या, तेल, मीठ, इत्यादी.

# कृती- पाने चिरून धुवून घ्यावीत. लसूण पाकळ्या ठेचून घ्याव्यात. हिरव्या मिरच्या चिरून घ्याव्यात. चिरलेली पाने वाफवून घ्यावीत. पाणी टाकून द्यावे. तेलात लसूण नि मिरच्या टाकाव्या. नंतर वाफलेली भाजी टाकावी. चिंच टाकावी. चवी पुरते मीठ टाकून भाजी शिजू द्यावी.

संकलन : मिलिंद पंडित, कल्याण

संदर्भ : विकिपीडिया