🍀 रानभाजी - मटाळू 🍀

 

🍀  रानभाजी - मटाळू  🍀

वृत्त एकसत्ता न्यूज 

संकलक : आकाश भाग्यवंत नायकुडे 

अकलूज दिनांक 13/9/2026 :

मटाळू (डुकरकंद,करांदे,एअर पोटॅटो) ही एक वेलवर्गीय आयुर्वेदिक औषधी नि भाजी आहे. वेलीवर येणाऱ्या वरच्या कंदा सोबत या वेलीचा जमिनीत पण मोठा कंद असतो ज्याला सर्व बाजूंनी बारीक मुळे असतात. हे दोन्ही कंद सोलून उकडून खाल्ले जातात. तसेच त्याची बटाट्या सारखी कोरडी भाजी पण बनवतात. या वेलाची फुले फांदीत गुच्छाच्या स्वरूपात उगवतात व त्यांचा रंग पांढरट असून आकाराने ती लहान असतात. फळे लहान गोलाकार असून यांची बीजे पंखयुक्त असतात. या वनस्पतीचा उपयोग खवखवणारा घसा, मुळव्याध, अतिसार यावर केला जातो. शरीरावर आलेल्या गाठींवर देखील ते प्रभावी ठरते.

*पाककृती : भाजी*

# साहित्य- मटाळू, तेल, बारीक चिरलेला कांदा, मिरची, लसूण, जिरे, तिखट, मीठ, हळद, टमाटे, कोथंबीर, मसाले.

# कृती- एक पातेल्यात पाणी घेऊन त्यात मटाळू मीठ घालून उकळून घ्यावे. शिजल्या नंतर मटाळू सोलून घ्यावे. नंतर एका पातेल्यात तेल गरम करून त्यात बारीक चिरलेला कांदा, मिरची, लसूण, जिरे, तिखट, मीठ, हळद व मसाला तळून घ्यावे. नंतर त्यात मटाळूचे बारीक तुकडे टाकून शिजू द्यावे. नंतर त्यात कोथंबीर टाकावी. अशा प्रकारे भाजी तयार होईल.

*पाककृती : पानांचे वडे*

# साहित्य- मटाळूची कोवळी पाने, बेसन, तेल, तिखट, मीठ, हळद.

# कृती- प्रथम बेसन मळून घ्यावे. त्यात चवीनुसार मीठ, तिखट, हळद मिसळून घ्यावे. मळलेले बेसन मटाळूच्या पानावर पसरून त्यावर दुसरे पान ठेऊन गुंडाळून घ्यावे. नंतर पानाच्या गुंडाळ्या वाफेवर शिजवून घ्याव्या. त्यांचे बारीक तुकडे किंवा वड्या करून तेलात तळून घ्याव्या. 

संकलन : मिलिंद पंडित, कल्याण

संदर्भ : इंटरनेट ═━═━═━═━═━═━═━═━═━═━═*