चाकू-कात्री न वापरता मेंदूची शस्त्रक्रिया
'गॅमा नाईफ' विज्ञानाचा चमत्कार
वृत्त एक सत्ता न्यूज
संकलक : आकाश भाग्यवंत नायकुडे
अकलूज दिनांक11/9/2026
निसर्गाने आपल्या मेंदूची रचना करताना त्याला एका अत्यंत सुरक्षित तिजोरीत ठेवलं आहे, ती म्हणजे आपली कवटी. ही कवटी आठ हाडांनी बनलेली असते. पण जेव्हा या तिजोरीच्या आत काही बिघाड होतो, म्हणजे एखादी गाठ किंवा ट्यूमर होतो, तेव्हा डॉक्टर ही तिजोरी उघडण्याचा सल्ला देतात. याला वैद्यकीय भाषेत 'क्रॅनिओटॉमी' म्हणतात. पण विचार करा, जर ही तिजोरी न फोडता, एकही जखम न करता आतली गाठ काढता आली तर? अगदी हेच काम करतं 'गॅमा नाईफ'.
'गॅमा नाईफ' मध्ये कोणतीही स्टीलची सुरी किंवा कात्री नसते. हे नाव वाचून कोणाला वाटेल की एखादा लेझरचा चाकू असेल, तर तसं नाही. हे एक अत्यंत प्रगत रेडिएशन तंत्रज्ञान आहे. सोप्या भाषेत सांगायचं तर, हे 'बिनटाक्याचं आणि बिनरक्ताचं' ऑपरेशन आहे.
२०२६ च्या ताज्या वैद्यकीय अहवालानुसार, आता या गॅमा नाईफ तंत्रज्ञानात 'आर्टिफिशियल इंटेलिजन्स' (AI) चा वापर सुरू झाला आहे. यामुळे मेंदूतील गाठीचा आकार आणि स्थान इतक्या अचूकतेने शोधलं जातं की, निरोगी पेशींना धक्का लागण्याची शक्यता आता शून्य टक्क्यावर आली आहे.
आपल्या लहानपणी आपण सूर्यप्रकाशात भिंग धरून कागद जाळण्याचा प्रयोग केला असेल. सूर्यप्रकाश तसा अंगाला पोळत नाही, पण जेव्हा भिंगाद्वारे तो एका बिंदूवर केंद्रित होतो, तेव्हा तिथे उष्णता निर्माण होऊन कागद जळतो. गॅमा नाईफ अगदी याच तत्त्वावर चालतं.
*१)* किरणांचा मारा : यात कोबाल्ट-६० मधून निघणारे सुमारे १९२ गॅमा किरणांचे स्रोत असतात.
*२)* अचूक केंद्रबिंदू :हे सर्व किरण वेगवेगळ्या दिशांनी मेंदूत प्रवेश करतात. एकटा किरण मेंदूच्या पेशींना इजा पोहोचवू शकत नाही, इतका तो कमकुवत असतो.
*३)* लक्ष्य : हे सर्व १९२ किरण जेव्हा मेंदूतील त्या गाठीच्या एकाच बिंदूवर एकत्र येतात, तेव्हा तिथे प्रचंड ऊर्जा निर्माण होते. ही ऊर्जा त्या गाठीचा डीएनए नष्ट करते आणि गाठ हळूहळू सुकायला लागते.
धावपळीच्या आयुष्यामुळे आणि वाढत्या ताणामुळे मेंदूशी संबंधित आजारांचे प्रमाण वाढत आहे. पूर्वी मेंदूच्या शस्त्रक्रिये नंतर रुग्णाला महिनाभर तरी विश्रांती घ्यावी लागायची, डोक्यावर मोठे टाके असायचे. पण गॅमा नाईफमुळे आता चित्र बदललंय. सकाळी हॉस्पिटल मध्ये जाऊन संध्याकाळी घरी येऊन तुम्ही आरामात घरचं वरण-भात जेवू शकता, इतकी ही प्रक्रिया सुटसुटीत झाली आहे.
हे तंत्रज्ञान म्हणजे विज्ञानाने दिलेलं एक वरदानच आहे. नुकत्याच झालेल्या एका आरोग्य परिषदेत तज्ञांनी सांगितलं की, मुंबईतील काही मोठ्या रुग्णालयांनी आता 'गॅमा नाईफ एस्प्रीट' ही सर्वात आधुनिक प्रणाली कार्यान्वित केली आहे, ज्यामुळे उपचाराचा वेळ आणखी कमी झाला आहे.
गॅमा नाईफचे फायदे-
१) जखम नाही : डोक्याला कुठेही कापाकापी करावी लागत नाही.
२) ऍनेस्थेशियाची गरज नाही. रुग्ण पूर्णपणे शुद्धीत असतो, डॉक्टरांशी बोलू शकतो.
३)अचूकता : हे तंत्रज्ञान १ मिलीमीटर पेक्षाही कमी अंतराच्या अचूकतेने काम करतं.
४) कमी वेळ :शस्त्रक्रिये नंतर दुसऱ्याच दिवशी रुग्ण नियमित हालचाली करू शकतो.
पण एक महत्त्वाचा मुद्दा असा आहे की, हे तंत्रज्ञान महागडं आहे. यासाठी साधारण ६५ कोटी रुपयांची गुंतवणूक करावी लागते. त्यामुळे काही मोजक्या इस्पितळातच ही सुविधा उपलब्ध आहे. शस्त्रक्रिये नंतरचा दवाखान्याचा खर्च कमी होतो आणि दुखणे बरे होण्यासाठी वेळ कमी लागतो. त्यामुळे गॅमा नाईफ हा परवडणारा पर्याय ठरू शकतो.
विज्ञानाने प्रगती केली असली, तरी तिजोरी उघडण्याची वेळच येऊ नये हीच आपली इच्छा असते. पण जर वेळ आलीच, तर आता घाबरण्याचं कारण नाही. आपल्या पूर्वजांनी म्हटलं होतं की 'शरीरमाद्यं खलु धर्मसाधनम', म्हणजे शरीर सुदृढ असेल तरच बाकी गोष्टी साध्य करता येतात. आजच्या काळात हे साध्य करण्यासाठी गॅमा नाईफ सारखी आधुनिक शस्त्रं आपल्या मदतीला आहेत.
निसर्गाच्या या गुंतागुंतीच्या रचनेला पूर्णपणे समजून घेणं मानवाला कठीण आहेच, पण भविष्यात विज्ञानामुळे शस्त्रक्रिया पूर्णपणे 'पेनलेस' होतील अशी आशा बाळगायला काही हरकत नाही. महत्त्वाची टीप : बोभाटाचा हा लेख केवळ माहितीसाठी आहे. कोणताही वैद्यकीय निर्णय घेण्यापूर्वी तज्ञ डॉक्टरांचा सल्ला नक्कीच घ्या.
*©️ बोभाटा*
*संकलन : मिलिंद पंडित, कल्याण*
0 टिप्पण्या