💢 काँग्रेसच्या घरातला उमेदवार देऊन भाजपने टाकला डाव 🔵 एका दगडात तीन पक्षी! पुणे पदवीधरमध्ये भाजपने काढलेलं 'कोल्हापुरी कार्ड' आणि काँग्रेसची कोंडी!

 विषय हार्ड:

💢 काँग्रेसच्या घरातला उमेदवार देऊन भाजपने टाकला डाव

🔵 एका दगडात तीन पक्षी! पुणे पदवीधरमध्ये भाजपने काढलेलं 'कोल्हापुरी कार्ड' आणि काँग्रेसची कोंडी!

वृत्त एकसत्ता न्यूज

माहिती सेवा ग्रूप पेठवडगाव

कोल्हापूर /अकलूज दिनांक 6 : 

​पुणे पदवीधर मतदारसंघाच्या निवडणुकीचे वारे आता चांगलेच तापू लागले आहेत. राजकारणाच्या या बुद्धिबळाच्या पटावर भारतीय जनता पक्षाने नुकतीच जी खेळी खेळली आहे, तिने भल्याभल्या राजकीय पंडितांना विचार करायला भाग पाडले आहे. भाजपने उमेदवारी जाहीर करताना एक असे विस्मयकारी नाव पुढे आणले आहे, ज्याने पुणे पदवीधर आणि शिक्षक मतदारसंघाच्या राजकारणात एकच खळबळ उडवून दिली आहे. हे नाव आहे, डॉ. स्मिता योगेश जाधव! ज्या भारतीय जनता पक्षाचा हा बालेकिल्ला होता, जो २०२० मध्ये त्यांच्या हातून निसटला, तो पुन्हा काबीज करण्यासाठी भाजपने थेट काँग्रेसच्या तंबूतून 'कोल्हापुरी कार्ड' बाहेर काढले आहे. हा केवळ एका उमेदवाराचा विषय नाही, तर राजकीय साठमारीचा आणि अस्तित्वाचा एक अत्यंत हार्ड विषय आहे.

​सलग पाच वेळा पुणे पदवीधर मतदारसंघावर भाजपचा एकमुखी अंमल होता. प्रकाश जावडेकर यांनी सलग तीन वेळा तर चंद्रकांत दादा पाटील यांनी सलग दोन वेळा या जागेवर वर्चस्व गाजवले होते.

पण २०२० च्या निवडणुकीत अजित पवार आणि शरद पवार यांच्या संयुक्त ताकदीसमोर भाजपला पराभवाची धूळ चारावी लागली होती आणि अरुण लाड मोठ्या फरकाने विजयी झाले होते. आता २०२५ मध्ये त्याच अरुण लाड यांनी भाजपमध्ये प्रवेश केल्याने, त्यांचे सुपुत्र शरद लाड यांना उमेदवारी मिळेल, अशीच सकाळपर्यंत सर्वांची अटकळ होती. मात्र, भाजपने धक्कातंत्राचा वापर करत थेट डॉ. स्मिता जाधव यांच्या गळ्यात उमेदवारीची माळ टाकली. आता तुम्हाला वाटेल, स्मिता जाधव नेमक्या आहेत तरी कोण? तर त्यांचे घराणे हे राजकारणातील आणि सामाजिक क्षेत्रातील दिग्गजांचे आहे. त्या शिक्षणमहर्षी डी. वाय. पाटील यांच्या कन्या भाग्यश्री पाटील आणि पी. डी. पाटील यांच्या सुकन्या आहेत. इतकेच नाही तर काँग्रेसचे मातब्बर नेते सतेज ऊर्फ बंटी पाटील यांच्या त्या सख्ख्या भाची आहेत. कोल्हापूरच्या 'पुढारी' वृत्तपत्र समूहाचे प्रतापसिंह जाधव यांच्या त्या सूनबाई आणि योगेश जाधव यांच्या पत्नी आहेत. बिझनेस मॅनेजमेंटचे शिक्षण, कस्तुरी क्लबच्या माध्यमातून १८ हजार महिलांचे भक्कम संघटन आणि मीडिया, शिक्षण व सामाजिक क्षेत्रातील त्यांचा दबदबा, हे सर्व पाहता भाजपने किती बारकाईने एकाच दगडात अनेक पक्षी मारले आहेत, याचा अंदाज येतो.

​या खेळीमागचे सर्वात मोठे राजकारण म्हणजे काँग्रेसची केलेली कोंडी. महाविकास आघाडीकडून ही जागा शरद पवार गटाच्या राष्ट्रवादी काँग्रेसला जाणार आहे, म्हणजेच तिथे काँग्रेसचा उमेदवार नसेल. अशा स्थितीत बंटी पाटलांसारखा काँग्रेसचा मोठा नेता आणि डी. वाय. पाटील समूहासारखी महाकाय शैक्षणिक संस्था, ज्यांचे १५० हून अधिक संस्थांचे जाळे आहे, त्यांचा प्रभाव भाजपने स्मिता जाधव यांच्या रूपाने स्वतःकडे वळवून घेतला आहे. आजवर पुणे शिक्षक मतदारसंघावर जसा सोलापूरचा अंमल राहिला, तसा आता पदवीधर मतदारसंघासाठी भाजपने कोल्हापूरचे अस्त्र उपसले आहे. कोल्हापूर, सांगली, सातारा आणि सोलापूर असा विस्तार असलेल्या या पट्ट्यात बंटी पाटील आणि डी. वाय. पाटील यांचे शैक्षणिक साम्राज्य निर्णायक ठरू शकते. त्यामुळे, काँग्रेसच्या घरातला उमेदवार देऊन भाजपने विरोधकांसमोर एक तगडे आणि भक्कम आव्हान उभे केले आहे.

​दुसरीकडे, या राजकीय रणांगणात राष्ट्रवादी काँग्रेसच्या शरद पवार गटाकडून हर्षदा जाधव यांचे नाव चर्चेत आहे. हर्षदा जाधव यादेखील उच्चविद्याविभूषित असून त्या पुण्याचे माजी विभागीय आयुक्त प्रभाकर देशमुख यांच्या कन्या आहेत. त्यामुळे यंदाची पुणे पदवीधरची निवडणूक साधीसुधी नसून, दोन उच्चविद्याविभूषित आणि मातब्बर घराण्यांच्या लेकींमधील अटीतटीची 'टक्कर' असणार आहे. या सर्व राजकीय समीकरणांमध्ये गोकुळ दूध संघाच्या आगामी निवडणुकीचेही संदर्भ अत्यंत महत्त्वाचे आहेत. राज्यातील सर्वात मोठ्या असलेल्या या दूध संघाच्या निवडणुकीत हसन मुश्रीफ, बंटी पाटील आणि महाडिक यांच्यात नेमका काय समझोता होणार, याची सर्वांनाच उत्सुकता आहे. हसन मुश्रीफ हे त्यांचे चिरंजीव 'भैय्या' यांना तिकीट मिळावे यासाठी मोठ्या प्रमाणावर प्रयत्न करत होते, पण त्यात ते यशस्वी झाले नाहीत. त्यामुळे त्यांची मनधरणी करण्यासाठी आणि कोल्हापूरच्या राजकारणात तडजोड करण्यासाठीच भाजपने हे कोल्हापुरी कार्ड खेळले आहे का, असाही दाट संशय व्यक्त होत आहे.

​मात्र, पडद्यामागे कितीही राजकीय समझोते होत असले तरी, या निवडणुकीत सर्वसामान्यांचा, विशेषतः तरुणांचा रोष कसा व्यक्त होणार, हा खरा आणि गंभीर प्रश्न आहे. एमपीएससी विद्यार्थ्यांची रस्त्यावर सुरू असलेली संतप्त आंदोलने, राज्यात निर्माण झालेली भीषण दुष्काळी परिस्थिती आणि जंतर-मंतरवरील आंदोलनानंतर केंद्र सरकारविषयी तरुणांमध्ये धुमसत असलेला जनक्षोभ या सगळ्यांचा थेट फटका भाजपला बसणार का? की, बंटी पाटलांची भाची आणि पुढारीची सून या 'कोल्हापुरी कार्ड'च्या बळावर भाजप आपला हरवलेला बालेकिल्ला पुन्हा सर करणार? हे पाहणे अत्यंत रंजक आणि निर्णायक ठरणार आहे. या सर्व राजकीय धुरळ्याचा अंतिम निकाल २३ तारखेलाच स्पष्ट होईल. तोपर्यंत हा राजकीय खेळ महाराष्ट्राच्या राजकारणात एक वेगळाच धुरळा उडवणार, हे मात्र नक्की!